mushkil hai apna mel priye, ye pyar nahi hai khel priye.

"Mushkil hai apna mel priye, Ye pyar nahin hai khel priye,
tum MA 1st division ho, Main hua metric phel priye,
mushkil hai apna mel priye, ye pyar nahi hai khel priye,

tum fauji afsar ki beti, main to kisaan ka beta hoon,
tum rabadi kheer malai ho, main to sattu sapreta hoon,
tum AC ghar me rahti ho, main ped ke neeche leta hoon,
tum nai maruti lagti ho, main scooter lambreta hoon,
id kadar agar hum chup-chup kar aapas me prem badhayenge,
to ek roz tere daddy amrish puri ban jaayenge,
sab haddi pasli tod mujhe bhijwa denge wo jail priye,
mushkil hai apna mel priye, ye pyar nahi hai khel priye,

tum arab desh ki ghodi ho, main hoon gadhe ki naal priye,
tum diwali ka bonus ho, main bhukhon ki hadtaal priye,
tum heere jadi tashtari ho, main alumunium ki thaal priye,
tum chicken soop biryani ho, main kankad wali daal priye,
tum hiran-chaokhadi bharti ho, main hoon kachue ki chaal priye,
tum chandan-wan ki lakdi ho, main hoon babool ki chaal priye,
main pake aam se latka hoon, mat maaro mujhe gulel priye,
mushkil hai apna mel priye, ye pyar nahi hai khel priye,

main shanidev jaisa kuroop, tum komal kanchan kaya ho,
main tan-se man-se kaashi ram, tum maha chanchala maya ho,
tum nirmal paawan ganga ho, main jalta hua patanga hoon,
tum raj ghat ka shanti march, main hindu-muslim danga hoon,
tum ho poonam ka taj mahal, main kali gufa ajanta ki,
tum vardaan vidhata ka, main galti hoon bhagvanta ki,
tum jet vimaan ki shobha ho, main bus ki thelam thel priye,
mushkil hai apna mel priye, ye pyar nahi hai khel priye,

tum nai videshi mixi ho, main pathar ka silbatta hoon,
tum AK-santalis jaisi, main ik desi katta hoon,
tum chatur rabadi devi si, main bhola bhala laalu hoon,
tum mukt sherni jangal ki, main chidiyaghar ka bhaloo hoon,
tum vyast sonia gandhi si, main V.P. Singh sa khali hoon,
tum hansi madhuri dixit ki, main policeman ki gaali hoon,
kal jail agar ho jaaye to dilwa dena tum bail priye,
mushkil hai apna mel priye, ye pyar nahi hai khel priye,

main dhaabe ke dhanche jaisa, tum paanch sitara hotel ho,
main mahue ka desi tharra, tum red-label ki botal ho,
tum chitar-haar ka madhur geet, main krishi-darshan ki jhaadi hoon,
tum vishva sundari si kamaal, main teliya chaap kabadi hoon,
tum sony ka mobile ho, main telephone wala hoon chonga,
tum machli mansrover ki, main sagar tat ka hoon ghongha,
dus manzil se gir jaunga, mat aage mujhe dhakel priye,
mushkil hai apna mel priye, ye pyar nahi hai khel priye,

tum satta ki maharani ho, main vipaksha ki lachari hoon,
tum mamta-jailalitha si, main kwaran atal-bihari hoon,
tum tendulkar ka shatak priye, main follow-on ki pari hoon,
tum getz, matiz, corolla ho, main leyland ki lorry hoon,
mujhko refree hi rahne do, mat khelo mujhse khel priye,
mushkil hai apna mel priye, ye pyar nahi hai khel priye."

Dont know who wrote this, but this is amazing.........